LAOAG CITY – Inpasingked ni Mayor Michael Marcos Keon ditoy siudad ti Laoag a nakigtot nga adda ti inpasa ti Sanggunian Panlungsod a resolusyon seknan iti panangutang ti lokal a gobierno ti siudad iti P250-million a maigatang iti bakuna kontra iti covid-19.
Segun kenni Keon, saan na nga in-request iti Sang. Panlungsod ti nasao a panagutang.
Mainaig iti daytoy, inbatad na a saan a kasapulan ti siudad nga umutang ti kwarta agsipod ta adda ti inyalokar a pondo ti gobierno national para iti daytoy.
Patien na a nu bilang makagatang ti gobierno national ti bakuna ket maysa ti probinsya nga Ilocos Norte pakairamanan ti siudad a maipaayan iti daytoy.
Kabayatanna, inbatad ni Vice Mayor Vicentito “Toto” Lazo ditoy siudad ti Laoag a ti resolusyon seknan iti panangutang ti gobierno lokal ditoy siudad ti P250-million ket saan nga initiatibo ni Mayor Michael Marcos Keon.
Kuna na a saan pay a sinertipikaran ti mayor daytoy kas urgent resolution.
Nu pay kasta, inlawlawag na a ti nasao a resolusyon ket para laeng ti panagsagana ti siudad nu bilang saan a makaumanay ti inlatang a pondo ti gobierno national para iti bakuna kontra iti covid-19.
Mainaig iti daytoy, inbaga ti bise mayor a nu kabaelan ti siudad ti umutang ti P400-million ti siudad para iti Laoag City General Hospital ket kabaelan na met nga umutang ti minilyon a gatad para iti salun-at dagiti umuli.
Inpetteng na a saan a dakes ti umutang nangruna nu ti salun-at dagiti residente ti mapagsasaritaan kangrunaan na ita a mapaspasaran ti pandemiya.
Innayun na pay a saan a kayat a sawen a nu umutang ti siudad ket kasapulan a mabayadan a dagus gapu ta maikkan met daytoy ti tawen tapno makabayad.
Kabayatanna, nagballag ti bise mayor iti kanayun a pannangsurot kadagiti naiyetnag a pagalagadan kontra iti coronavirus tapno naan-anay a masalwadan ti salun-at.
