LAOAG CITY – Inaprubaran ti konseho ditoy ciudad ti Laoag iti maikadwa ken maudi a pannakaibasa iti maysa a resolusyun a gagem na a maipaayan ti otoridad ni Mayor Michael Marcos-Keon a makipinnirma ti memorandum of agreement iti Population commission wenno PopCom Region 1 para iti pannakaestablisar ti information and service delivery network ditoy ciudad.
Inbatad ni Konsehal Juan Conrado Respicio ditoy ciudad ti Laoag a 11 dagiti kameng ti konseho a nagbotos pabor iti nasao a resolusyon.
Inpetteng ni Atty Respicio a bigbigen da ti kinapateg dagiti agtutubo iti panagprogreso iti ciudad.
Mainaig iti daytoy, inpetteng ti konsehal a trabaho ti gobierno lokal ti mangaramid iti pagannurutan ken programa para kadagiti agtutubo.
Innayon na a daytoy ti makaigapu a pinalubusan da ni Mayor Keon a nakipinnirma iti katulagan iti Population Commission tapno mapapintas ken maipatungpal dagiti programa a pagsayaatan dagiti agtutubo kangrunaan na iti benneg ti salun-at.
