LAOAG CITY – Inlawlawag ni Atty. Joel Ginez, ti provincial Comelec supervisor ditoy probinsya ti gagem ti inparuk-at ti Commission on Elections a Resolution No. 10732.
Naipalaon iti resolusyon a masapol a mangala dagiti kandidato ti permit iti Comelec tunggal adda ti iyuswat da nga aktibidad no sadinno a kwinestyunaran daytoy ni Senador ken presidential candidate Panfilo Lacson.
Inbatad ni Ginez a gagem ti nasao a resolusyon a mamonitor amin ti Comelec ti aktibidad dagiti agkamkampanya tapno masigurado a masursurot ti minimum public health standards iti baet ti pandemya a gubuay ti covid-19 virus.
Kuna na a naisaguday pay iti resolusyon nga adda ti pirmaan dagiti opisyal ti barangay gapu ta isuda ti kangrunaan a mangmonitor kadagiti kandidato no mapan da agkampanya wenno adda ti iyuswat da nga aktibidad iti masakupan da a lugar.
Kalikagom ti resolusyon nga inparuk-at ti Comelec a masigurado ti kinatalged dagiti kandidato ken botante.
Innayon na a saan laeng a dagiti kandidato ti mabalin a mapan mangala ti permit iti comelec no adda ti iyuswat da nga aktibidad no di ket mabalin da latta a baunen dagiti abogado wenno siasinno man a kakadwa da isut gapuna a saan a maibilang nga impractical ti nasao nga addang a kas ti naibaga ni senador Lacson.
Mainaig iti daytoy, inlawlawag pay ni Ginez a no iti Category level 1 ket saan a malimitaran ti kadwa dagiti kandidato no mapan agkampanya a personal; Category level 2, 5 laeng ti mangkuyug iti kandidato; Category Level 3, tallo laeng ti mangkuyug, ngem ni Category Level 4 ken 5 ket maipawil ti mapan agkampanya.
Inpetteng ni Ginez a kayat man wenno saan dagiti kandidato ket masapol nga agtungpal da iti naipalaon iti inparuk-at ti comelec a resolusyon tapno awan ti malabsing ken pakababalawan da.
