LAOAG CITY – Natay ti maysa a restaurant cook kalpasan a nagbekkel iti puon iti kayo ti mangga iti Municipal Cemetery iti Brgy 21, Libtong iti ili ti Bacarra.
Segun iti Philippine National Police iti nasao nga ili, nabigbig ti biktima nga agtawen ti 35, awanan asawa ken residente ti Brgy. 24, Macupit iti ili ti Bacarra.
Basar iti naisayangkat nga imbestigasion, adda ti naawat a tawag iti kuerpo ti pulisia manipod ken ni Jovencio Maneja y Rosario, agtawen ti 69, balo, Caretaker iti Municipal Cemetery ken residente iti Brgy. 10, San Vicente iti nasao met laeng nga ili a mangibagbaga nga adda ti nakitana a nagbekkel iti puon iti kayo ti mangga iti laud a paset ti Municipal Cemetery a pagbanbantayanna.
Mainaig iti daytoy, naripar ni Maneja nga adda ti maysa a motorsiklo nga Honda TMX 125 nga agmaris ti nangisit a naka-parking iti nasao a lugar rason a binirukna ti akinkukua daytoy agingga a nakita ti maysa a bangkay ti biktima a nakabitin iti puon iti kayo ti mangga.
Basar kadagiti otoridad, kinuna ti ama ti biktima a ni Rolando Domingo y Calamayan a naudina a nakita ti anakna idi timmalaw a napan nagubra ken sipod idin ket saanen a nagsubli iti pagtaenganda.
Inlawlawag pay ti ama ti biktima nga awan met ti naidumduma a garaw ti anakna sakbay a napasamak ti insidente isu a nakigtot apaman a naammoanna daytoy.
Mainaig iti daytoy, naammoan a maibasar ken ni Dr. Lester Sigabu, ti Municipal Health Officer iti ili ti Bacarra ket rumrummuar a ti nangitunda ti pannakatay ti biktima ket gapu iti asphyxia secondary to hanging ken awan ti foul play a napasamak iti nasao nga insidente.
Kabayatanna, inpakaammo ni Police Lieutenant Colonel Roldan Suitos, ti Hepe iti Philippine National Police iti ili ti Bacarra a basar iti imbestigasionda ket rumrummuar a depresyon ti nangitunda ti panagpakamatay ti biktima kalpasan a maipagarup a saanna a maawat ti pannakatay ni lolana.
