LAOAG CITY – Maysa a diner idiay Ocean City, Maryland ti makapaspastrek ti ekstra a kuarta gapu iti ar-aramidenda a sabon a naggapu iti sebo ti lutlutuenda a bacon.
Idi 2022, panpanunutenen ni Sam Delauter nga ipaserra ti restaurant a Sunrise Diner gapu iti ngumatngato a presio dagiti magatgatang. Arig awanen ti agsubsubli iti puunanna gapu ta amin dagiti ingredients nga us-usaren ti menu ket ngimmina ti presiona.
Nupay kasta, maysa nga aldaw kabayatan nga ibelbellengna ti sebo a naglutuanda ti bacon ket kellaatna a nalagip ti estoria maipanggep iti lolana a ni Hazel Delauter. Idi panawen ti panagrigat ti Estados Unidos wenno The Great Depression, ti lolana a ni Hazel mismo ti agar-aramid ti sabon manipud iti bacon grease.
Kiniddaw ni Sam iti lolana ti recipe ti sabon ken inadalna no kasanona a mausar ti bacon grease iti diner-na tapno agbalin a sabon.
Kalpasan ti sumagmamano a trial ti error, nakaaramid ni Sam ti baro a pagdigus ken inawaganna daytoy kas “Bumble Soap.”
Iti agdama, makapaspastrek ni Sam ti $10,000 iti kada tawen manipud iti Bumble Soap. Nakatulong ti mapaspastrekna tapno mapagtalinaed a nakalukat ti diner-na.
