LAOAG CITY – Negatibo ti nagbalin a resulta ti swab test dagiti innem a fish vendors iti merkado publiko iti ili ti Pinili.
Daytoy ti kinumpirmaran ni Mayor Rommel Labasan iti nasao nga ili kalpasan a naiyuswat ti mandatory swab testing kadagiti amin nga aglaklako iti merkado publiko iti ili ti Pinili.
No pay kasta, inpakaamo na a saan nga aggigiddan amin a dumalan ti swab test dagiti aglaklako.
Immuna iti daytoy, naamoan a nagpositibo iti COVID-19 ti maysa a residente idiay Cabugao, Ilocos Sur ngem aglaklako iti fish section iti tiendaan ti Pinili kalpasan a dimmalan ti antigen test iti Border Control iti ili ti Badoc.
Innayun ti mayor nga idi kalman ket dimmalan iti swab test dagiti sumagmamano a fish vendors, meat vendors ken vegetable vendors idinto a sumarunonto dagiti dadduma pay.
Inpasigurado ni Mayor Labasan a kalpasan a dumalan ti swab test dagiti vendors ket agtalinaedda pay laeng iti uneg ti pagtaenganda kas panangsurot ti pagalagadan nga ag-Home Quarantine kabayatan a maiyur-uray ti resulta ti swab test.
Kabayatanna, adda met dagiti kameng ti PNP Pinili ken BFP Pinili a naiget a mangbaybayabay kadagiti amin a rumuar ken sumrek iti merkado publiko iti ili ti Pinili.
