LAOAG CITY – Awan pay ti inparuk-at ti Mariano Marcos Memorial Hospital and Medical Center a resulta ti swab test ti driver a napan nangsukon ti nurse a nagpositibo ti covid-19 a nagawid ditoy ciudad ti Laoag a naggapo iti Metro Manila.
Daytoy ti inbatad ni Barangay Chairman Reynaldo Garcia iti Barangay Palongpong iti ciudad ti Batac kalpasan nga adda dagiti maipagarop a mangiwarwaras a positibo ti resulta ti swab test ti driver a kabarangayan da.
Inadmitir pay ti kapitan a nasakit ti nakem na gapu iti agwarwaras a damag ket makapaspasar da payen ti diskriminasyon manipod kadagiti lumugar iti kabangibang da a barangay.
Kabayatanna, inlawlawag ti kapitan a saan a nailockdown ti sibubukel a barangay da no di ket dagiti laeng innem a balay iti sitio Busel gapu ta isu ti pagnanaedan ti nasao a driver.
Kuna na nga awan pulos ti mapalubusan a rumuar kadagiti agnaed kadagiti innem a balay, ken amin a kasapulan da ket isuda nga opisyal ti barangay wenno dagiti Barangay Health Workers (BHW) ti mapan gumatang ken mangidanun kadakuada.
Iti agdama, kuna ni Garcia a naiget ti panangbantay da kadagiti agnaed iti innem a balay tapno masigurado nga awan dagiti makaruwar agingga a saan a rumuar ti resulta ti swab test ti nasao a driver.
Ti nurse a taga Barangay 8 ditoy ciudad ti Laoag a naggapo iti Metro Manila ti maika-walo a kaso a ti covid-19 ditoy probinsya.
