LAOAG CITY – Pinaruar iti pampasahero nga eroplano ni retired UFC fighter Khabib Nurmagomedov kalpasan a nakisinnungbat iti maysa kadagiti staff ti Alaska Airlines.
Namunganay ti saan a panagkikinnaawatan iti pagtugawan iti nasao a Russian fighter.
Adda iti Harry Reid International Airport idiay Las Vegas ti eroplano isu a binayabayan isunan dagiti airport police a rummuar iti eroplano.
Makita iti nagwaras a bidyu a kinasarita ti flight attendant ti agtawen iti 36 nga UFC fighter no adda ti kapasidad daytoy a tulungan ti dadduma manipud iti window exit seat.
Inpetteng ti Russian fighter a saan nga umiso a tumulong isuna ken inpapilitna ti desision.
Agturong koma idiay California ni Nurmagomedov tapno suportaran ti team-na a lumaban iti UFC 311 inton Enero 18.
Addaan isuna ti record a 29 a panangabak ken awan pay ti abakna sakbay a nagretiro.
