LAOAG CITY – Nangiyisyu ti notice ti Department of Agriculture tapno agpalawag kadagiti retailers iti maysa a tiendaan idiay Marikina iti saan a panangsurot dagitoy iti naikeddeng a Maximum Suggested Retail Price kadagiti produkto a baboy ken bagas.
Daytoy ket kalpasan a natiliw ti departamento dagitoy nga aglaklako iti nanginngina a presio maidasig iti napagnunumoan a Maximum Suggested Retail Price.
Iti inwayatda a random inspection iti tiendaan ket natiliwda dagiti aglaklako ti liempo nga addaan ti presio a P430/kilo idinto ti pigue ken kasim ket magatang iti presio iti P400/kilo.
Daytoy a presio ket nanginngina maidasig iti naikeddeng a Maximum Suggested Retail Price ti departamento a P380/kilo para iti liempo ken P350/kilo met para iti pigue ken kasim.
Iti datos, 20% laeng ti nag-comply iti maipatpatungpal a Maximum Suggested Retail Price sipod naipatungpal daytoy idi Marso 10.
Inbatad ni Department of Agriculture Asec. Genevieve Velicaria-Guevarra, sinurot laeng dagiti retailers ti presio dagiti dealers ken dagiti maaw-awatda a deliveries.
Iti biang met dagiti produkto a bagas, nakita ti Department of Agriculture nga adda dagiti aglaklako ti P52/kilo ti imported premium rice iti nasao a tiendaan a nangatngato maidasig iti naikeddeng a P45/kilo.
Kuna ni Guevarra, adu ti suplay ti bagas ita ditoy pagilian isu a saan a makita ti ahensia no ania ti rason no apay kinasapulan pay a nangipangato ti presio dagiti retailers.
Kabayatanna, sumagmamano a retailers met ti mangibagbaga a gapu iti nangina a renta kadagiti puesto ti nagbalin a rason ti panangipangatoda ti presio.
Iti agdama, nakatuktok ti departamento iti pannakapasayaat ken pannakaipatungpal ti naig-iget a pannnakaipatungpal ti Maximum Suggested Retail Price kadagiti nasao a produkto.
