LAOAG CITY – Natay ti maysa a retirado a kameng ti Philippine Airforce kalpasan a natennag iti derraas ti nagluganan na a Toyota Fortuner iti paset ti Sitio Rubruban, Brgy. 19, Abucay iti ili ti Piddig.
Binigbig ni Police Capt. Rudy James Jacalne, ti chief of police iti ili ti Piddig ti biktima a ni Avelino Crisostomo, agtwen ti 64, naasawaan, retirado a kameng ti Philippine Airforce ken residente iti Brgy. 20, San Jose iti ili ti Sarrat.
Inbatad ni Jacalne a basar iti imbestigasyon, napan nakiminatay ti biktima iti Brgy. San Julian iti ili ti Solsona ken iti panagawid ni Crisostomo ket ditoyen a napasamak ti insidente.
Inlawlawag ni Jacalne a napasamak ti insidente idi rabii paylaeng ti domingo ngem nakita laeng ti biktima idi malem ti Lunes, Hunyo 5 babaen kadagiti kameng ti Tulong-Panghanapbuhay sa Ating Disadvantaged Displace-Workers (TUPAD) nga agdaldalus iti lugar.
Segun ken ni Jacalne, saan a dagus a nakita ti biktima gapu ta manmano laeng ti magmagna a behikulo iti lugar kangrunaan na iti rabii nga isu ti pannakapasamak ti insidente.
Mainaig iti daytoy, inpakaammo ti opisyal a naikabil ti bangkay ni Crisostomo iti Piddig District Hospital nga isu ti nakaiwayatan ti post-mortem examination babaen ken ni Dr. Cheryl Laguatan.
Rumrumuar a ti biktima ket adda ti impluwensya ti nasanger idi napasamak ti insidente.
