LAOAG CITY – Inbatad ni Police Lt. Norman Pentang, ti chief of police iti ili ti Banna a pilaan da ti agsusukot a reklamo ti maysa a retirado a pulis a nagpaputok ti paltog idiay Barangay Macayepyep iti nasao nga ili.
Iti eksklusibo nga interview ti Bombo Radyo Laoag ken ni Pentang, inbatad na nga adda ti naireport kadakuada nga adda ti nagpaputok ti paltog iti Barangay Macayepyep isut gapuna a nagturong da a dagus tapno agimbestigar.
Inbatad na nga adda ti nakita da a metal fragment iti lugar ken iti panagimbestigar da kadagiti residente ket intudo da ti balay ti retirado a pulis a ni Rogelio Macaburas y Cristobal, agtawen ti 69, nga isu ti naggapoan ti putok ti paltog.
Segun ken ni Pentang, inadmitir a mismo ni Macaburas nga isuna ti nagpaputok ti paltog ken insuko na a dagus ti maysa a shotgun na nga adda karga na a tallo a bala.
Innayon na a ti palawag kadakuada ni Macaburas ket pinaputukan na ti pusa gapu ta kankanen na dagiti piyek iti balayda, ngem immabot ti metal fragment ti shotgun na iti balay ti karruba da.
Kuna ni Pentang, pilaan da ti reklamo nga Alarm and Scandal (Indiscriminate firing), Malicious Mischief ken panaglabsing ti Republic Act (RA) 10591 wenno Comprehensive Firearms and Ammunition Regulation Act ti retirado a pulis.
Kinumpirmaran ni Pentang a ti lisensya ti paltog ni Macaburas ket nag-expired pay idi 2017.
