LAOAG CITY – Nagsagaba ti sugat iti nagduduma a paset ti bagi ti maysa a retirado a pulis ken ti asawa na kalpasan a nagbaliktad ti nagluganan da nga Honda CRV iti pase ti boundary ti Barangay Dilavo ken Davila, Pasuquin, ILocos Norte.
Nabigbig ti retirado a pulis a ni Police Col. Mario Tangonan y Agas, driver ti HOnda CRV ken ti asawa na a ni Nenita Tangonan, residente dagitoy iti Barangay Buyon iti ili ti Bacarra.
Iti inisyal nga imbestigasyon, inbatad ni Police Chief Master Sergeant Ruel Silvestre, deputy chief of police iti ili ti Pasuquin, kabayatan ti panagpapa-amyanan a direksyon dagiti agasawa iti paset ti Barangay Dilavo iti nasao nga ili ket maipagarop a nakaturog ti retirado a pulis.
Gapu iti daytoy, aksidente a naidungpar iti bato nga adda iti igid bakras ti bantay a nangitunda ti panagbaliktad ti nasao a lugan.
Naitaray dagiti agasawa iti Governor Roque Ablan Senior Memorial Hospital (GRASMH) ditoy ciudad ti Laoag babaen ti ambulansya iti Rural Health Unit (RHU) para iti naan-anay a pannakataming dagiti nasao a biktima.
