LAOAG CITY – Nalamiisen a bangkay a naduktalan ti maysa a retirado a pulis iti bukod na a farm iti Brgy. 55-B Salet-Bulangon ditoy siudad ti Laoag.
Nabigbig ti biktima a ni retired PCol. Pantaleon Pacis, residente iti Brgy. 23 ditoy siudad.
Segun ken ni Brgy. Chairman Rodolfo Ramirez iti Brgy. Salet-Bulangon, adda ti naawatda a report seknan ti kaadda ti bangkay iti mismo a farm ni Pacis.
Kuna na a dita a nagresponde da a dagus ken nakita a nakadasay ken awanen ti biag ti retirado a pulis.
Inbatad na a nakapakleb ti biktima ken naiyuper ti rupa na iti kanal nga addaan ti agay-ayos a danom.
Mainaig iti daytoy, inbunannag na a basar iti inisyal nga eksaminasyon ni Dr. Joseph Adaya iti City Health Office, posible a naatake ken naulaw ti biktima rason a natumba ken napapakleb iti kanal.
Immuna iti daytoy, inpakaammo ni Ramirez nga iti kada alas kwatro ti bigat nga agturturong ti dati a pulis iti farm na ken nu madanon ti alas sais ti bigat ket makaawiden daytoy iti Brgy. 23.
Nu pay kasta, gapu iti napasamak ket saanen a napasangpet pay ti pamilya na.
