LAOAG CITY – Nagsagaba ti black eye dagiti dua a mata ti maysa a baro kalpasan a kinabkabil ti retirado a soldado iti Rest House iti Brgy. 13-A, Ar-arusip iti ili ti Badoc.
Nabigbig ti biktima a ni Ramshee Co, agtawen ti 26, baro ken residente ti Brgy. 15-B Alay iti ili a Badoc idinto a ti dati a soldado ket ni Reynaldo Agpuldo, residente ti Brgy. 3 Alogoog iti nadakamat met laeng nga ili.
Segun iti biktima, naginom ti suspek ken ti uliteg na a ni Eugene Salvacion idi malpas ti trabaho da a nagalad ti Cyclone wire, ken idi nalpas a naginom dagiti dua ket nagbati isuna iti Rest House ti suspek idinto a nagawid met ti uliteg na.
Ditoy a nakaturog ti biktima ken idi simmangpet ti suspek a naggapu iti Family House da ket maipagarop a kellaat lattan a ginuyod na ti ima na, dinanog-danog na ken kinugta-kugtaran na rason a lumlumteg dagiti dua a mata ni Co.
Inadmitir na nga inubor-ubor na ti Rest House ti suspek iti kabigatan na gapu iti pungtot na.
Inbatad met ti ina ti biktima a ni Isabel Co nga uray no nakabkabil ti anak na ket awan ti plano da nga agisaklang kontra ti dati a soldado ngem immapela a tumulong ti suspek a mangpaagas iti biktima.
Inpalgak ti Brgy. Chairman ti Brgy. 15-B Alay a ni Alex Tacotaco nga awan pay dimmanon kenkuana a reklamo mainaig iti napasamak a pannakadangran ti biktima.
Nupay kasta, kunana nga addan to ti maiyuswat a panagsasarita ti biktima, suspek ken ti pamilya ti biktima.
Kabayatanna, basar iti PNP-Badoc, awan ti naimaldit a pasamak mainaig iti nadakamat a reklamo ngem makikooperar da kadagiti opisyal ti nasao a barangay para iti imbestigasyon.
Kabayatanna, nagkedked metten ti suspek a nangted ti aniaman a komento wenno reaksyon seknan iti akusasyon kenkuana.
