LAOAG CITY – Agtultuloy ti imbestigasyon dagiti otoridad iti napasamak a pammaltog a nakatayan ti maysa a retirado a soldado iti uneg ti Maneras Compound iti Sitio Lawis, Barangay Paratong, Paoay, Ilocos Norte.
Binigbig ni Police captain Eddie Suyat, ti chief of police iti ili ti Paoay ti biktima a ni BERNARDO SADANG y OBISPO, 50, balo, retired Philippine Army, idinto a ti suspek ket ni JAMES MANERA y PAGTACCONAN, 52, naasawaan, farm owner, taga Barangay Medina iti ili ti Dingras ngem agdama nga agnanaed iti nadakamat a barangay.
Iti eksklusibo nga interview ti Bombo Radyo Laoag ken ni Suyat, inbatad na a ti biktima ken ti baro na a ni Mitchell Sadang y Galeon, 24, baro ket napanda naki-birthday ti nasao a farm.
Inbatad ni Suyat a kabayatan ti panaggiinom dagiti agama, ti suspek ken ti caretaker ti farm a ni Norbert Portela y Obilos, 25, residente met laeng iti nasao a barangay ket naibaga ti caretaker ti “PUMATAYAK”.
Gapu iti daytoy, nagdesisyon dagiti agama nga agawid da laengen ngem idi pumanaw dan ket binakal ida ti caretaker ti kawayan isut gapuna a sinublianan ti ubing a Sadang ket nagkabil dagiti dua.
Napan naganawa ti biktima ngem ti saan a masinunuo a rason ket kellaat lattan a pinaltugan ti suspek ti retirado a soldado a nakatamaan ti akin-kannigid a paset ti barukong na.
Naitaray ti biktima iti Mariano Marcos Memorial Hospital and Medical Center iti ciudad ti Batac ngem naideklara daytoy a dead on arrival.
Nakarekobre dagiti otoridad ti maysa a pedaso ti fired cartridge case ti saan pay a nadeterminar a klase ti paltog iti nakapasamakan ti krimen.
Nupay kasta, kinumpirmaran ni Suyat nga adda ti kalibre 45 a paltog ti suspek a nakalisensya, ngem saanna pay a maibaga no daytoy ti nausar iti napasamak a pammaltog.
Immunan nga inbatad ni Suyat nga inpetteng ti suspek a saan nga isuna ti nangpaltog iti biktima, ngem intudo daytoy ti ubing a Sadang a nangpaltog iti ama na.
Iti agdama, nagtalinaed ti suspek iti kustodyar ti PNP iti ili ti Paoay ken maisagsaganan ti reklamo a murder a maipila kontra kenkuana.
