LAOAG CITY – Maseknan ni retirado a Judge ti RTC Branch 16 ditoy ciudad ti Laoag Conrado Ragucos ti pangkurkurang dagiti huwes ditoy Ilocos Norte.
Segun ken ni Ragucos, idi actibo pay laeng daytoy, 50 a kaso ti nakasagana a trataren na iti kada aldaw.
Kuna na a kadagitoy nga agkurkurang ti huwes ket panagkita na , marigatan dagiti nabati a judge kas kada Judge Nida Alejandro ken Judge Francsico Quilala.
Ngamin kuna ti retirado a huwes nga adda da pay dagiti sabsabali a trabahueh dagiti huwes kas iti panagiparuk-at iti warrant of arrest ken sabsabali pay.
Gapu iti daytoy, kuna na a kasapulan koma a masulnitanen dagiti nagbakante a sala kas kadagiti immun-unan a nagretiro kas iti Branch 65 tapno mapadaras dagiti nakapending a kaskaso nangnangruna ket agtultuloy ti kampanya ti gobyerno panggep ti illegal a droga a nangpa-ado kadagiti kaso.
Innayon ti retirado a huwes a mabalin ti maysa a pribado nga abogado ken piskal la ketdi addan sangapulo a tawen nga ag-prac-practice nga agaplikar iti kina-huwes.
Segun ken ni Ragucos, maasapul a miyembro ti “bar” ken 10 a tawen a nagserserbin nga abogado tapno makapag-apply iti kina-huwes.
Kuna na a mabalin nga iyendorsar ti maysa a grupo kas iti Integrated Bar of the Philippines (IBP) ti siasinnuman nga agkalikagum ken maideretso iti opisna ni Pres. Rodrigo Duterte.
Inlawlawag na a ti Judicial and Bar Council (JBC) ti mangarisit kadagiti aplikante kalpasan na ket iten danto iti Presidente ti “short list” a pagpilian na.
Maipalagip nga immunan a nagkiddaw ti Sangguniang Panlalawigan babaen iti maysa a resolosyon a masukatan koman dagiti bakante a sala nga umabot iti 10 ken ni Pres. Duterte tapno mapaalisto ti pannakadengngeg dagiti pending a kaso.
