LAOAG CITY – Kinumpirmaran ni PMaj. Romel Ramos, ti chief of police iti PNP Bacarra a nakalibas manipod iti quarantine facility iti ili ti Bacarra ti maysa a returning resident.
Segun ken ni Ramos, ti nakalibas ket agtawen ti 19 a baro, tubo iti ili ti Vintar ken nakaileppas ti uppat nga aldaw a panagquarantine sakbay a naglibas.
Inpakaamo ni Ramos a limmusot ti baro iti tawa ti kwarto a nagyanan na ken nagna iti likod a paset ti quarantine facility.
Kuna na a posible a saan a nadlaw dagiti agbanbantay iti quarantine facility a rimuar ti baro isut gapu na a nagtultuloy a nakalibas.
Mainaig iti daytoy, inbatad ni Ramos nga immunan a napansin dagiti agbanbantay iti quarantine facility a saan a normal ti garaw ti baro.
Innayun na a posible a natuukan daytoy isut gapu na a napanunutan na ti naglibas.
Iti agdama ket nagtalinaed iti PNP Vintar ti baro kalpasan a nakemmeg dagiti otoridad iti pagtenganna a nagderetsoan na kalpasan a nakalibas iti quarantine facility.
Kabayatanna, inpakaamo pay ni Ramos a nakasaganan ti ipila a kaso ti PNP Bacarra a panagsakungasing iti RA 1132 kontra iti nakalibas a baro.
