LAOAG CITY – Saan a pabor Rev. Father Arvin Mangrubang iti Iglesia Filipina Idependiente iti panagibunong ti Gobierno Probinsyal ti contraceptive pills kadagiti agtutubo.
Daytoy ket kalpasan nga inrakurak ni Gov. Matthew Marcos Manotoc a kasapulanen ti panakaibunong ti contraceptive pills a kas solusyon iti agtultuloy a panagngato ti teenage pregnancy ditoy probinsiya.
Segun ken Fr. Mangrubang, saan a daytoy ti maiyannatop a soslusyon iti problema a sangsangwen ti probinsya seknan iti teenage pregnancy.
Kunana a no agibunong da kadagiti contraceptives ket arigna i-tolerate ti gobierno probinsyal ti pannakinaig.
Gapu iti daytoy ket inpaganetgetna nga adadda a kasapulan dagiti agtutubo ti usto nga edukasyon ken panangiwanwan dagiti nagannak.
Innayonna a no man pay umanamong isuna iti sex education ket masapul a maipakat laeng daytoy kadagiti agtawen iti 13 agpangato.
Kabayataanna, ginutigot ni Fr. Mangrubang dagiti Sanguniang Kabataan nga isuda ti mangidaulo ken mang-organisar kadagiti seminars seknan iti nasapa a panagsikog.
