LAOAG CITY – Nagkedked ni dati a Senador “Bong” Revilla nga agisubmitir ti plea iti kaso a malversation nga awan ti irekomendar a piyansa iti maminsan manen a panagsangona iti Sandiganbayan para iti arraignment ita nga aldaw ti Lunes, Pebrero 16.
Gapu iti daytoy, ti Sandiganbayan Third Division ti nangiserrek ti not guilty plea para ken ni Revilla.
Ti nasao a kaso ket adda ti pakainaiganna iti P92.8 milyon a ghost flood control project idiay Pandi, Bulacan.
Immunan a nangiserrek ti Sandiganbayan ti not guilty plea para ken ni Revilla kalpasan a nagkedked a mangisubmitir ti plea-na iti kaso a graft nga adda ti pakainaiganna iti maipagarup a maanomalya a proyekto.
Iti ruar ti Sandiganbayan, naminsan manen a nangipadanon ti suporta iti dati a Senador dagiti mangsupsuporta kenkuana kagiddan iti panangipukkawda a waya-wayaan ti dati a Senador.
Kabayatanna, simmango iti anti-graft court ni dati a Department of Public Works and Highways Bulacan engineer Brice Hernandez para iti arraignment-na.
Ti maysa pay a kapada nga akusado ni Revilla a ni dati Department of Public Works and Highways accountant Juanito Mendoza ket nangiserrek ti not guilty plea.
