LAOAG CITY – Inteden ni suspended Mayor Alex Calucag iti ili a Solsona ti inkari na a “reward money” iti siasinnuman a makaitudo ti makin-aramid iti nakam-ames a krimen a nakatayan ti maysa a baket ken maipagarup a narames pay iti Bgy. Maan-anteng iti nasao nga ili.
Segun ken ni Calucag, 20 a ribo a pisos ti inkari a maited a gunguna iti siasinnuman a makatulong a makasulbar iti nasao a krimen.
Kuna na nga idi kalman, kageddan iti pannakaiserbi ti suspension na ket inted na met ti nasao a gunguna kadagiti pulis a nakasulbar ti nasao a krimen.
Kuna na a makaammon dagiti pulis no kasano ti pamay-anda ti nasao a kantidad no ited da iti maysa kadagiti suspek a timpuar a nagsarita mainaig iti inaramid da a krimen wenno adda sabali a pakausaran na gapu ta ti nasken kenkuana ket nasulbar ti nasao a krimen.
Maipalagip a gapu ta awan ti nangbigbig ti nasao a baket ket kapilitan nga intabon ti gobyerno lokal ti ili a Solsona.
Maipalagip pay a nabirukan laengen ti nasao a babai a natay, adda bagkong kadagiti nagduduma apaset ti bagi na, natupakan pay ti bato ti tulo na ken maipagarup a narames.
