LAOAG CITY – Maluksaw ti maysa nga ama idiay Vintar, Ilocos Norte gapu ti maipagarop a saan a panangipalubos ti Rural Health Unit (RHU) a mausar ti ambulansya da a pakailuganan koma ti agpasngay a manugangna.
Inpetteng ni Mr. Carlito Maltezo iti Barangay Lubnac iti ili ti Vintar nga iti panagturong da iti RHU ket naibaga kadakuada nga adda ti protocol da iti pannakausar ti ambulansya.
Saanen a nasaludsod ni Maltezo no ania ti protocol a dakdakamaten ti RHU gapu ta agal-alisto da ken awanen ti panawen na a makidebate iti dayta a gundaway.
Gapu ti daytoy, inlugan lattan ni Maltezo ti manugang na iti SUV na ken isun ti nangitaray iti Mariano Marcos Memorial Hospital and Medical Center idiay ciudad ti Batac.
Inpakaammo na a kalpasan laeng ti tallo a minutos a nakadanun da iti ospital ket nagpasngayen ti manugang na ngem maladingitan da gapu ta pimmusay ti maladaga.
Inbatad na a ti palawag kadakuada dagiti doctor a nangtaming iti manugang na ket dakkel ti posibilidad na a nasalbar da pay ti biag ti maladaga no nasapsapa da a dimteng iti ospital.
Kabayatanna, inpasingked ni Sang bayan Member Maribel Albano, ti chairman ti committee on Health iti ili ti Vintar nga agpalawag ita a malem ditoy Bombo Radyo mainaig iti nasao a pasamak.
