LAOAG CITY – Nadadael dagiti suplay ti covid-19 vaccine kalpasan a nauram ti maikadua a kadsaaran ti Rural Health Unit iti ili ti San Nicolas.
Inbatad ni Fire Inspector Reynold Aguinaldo, ti fire marshal iti BFP San Nicolas nga iti mismo storage room a nakaikabilan ti refrigerator a naglaon ti bakuna ti nauram.
Kuna na a ti basar iti inisyal a panagimbetigarda ket posible nga adda ti nagperdi iti linya ti kuryente wenno iti refrigerator a nakaipanan ti bakuna.
Inbatad na a nasurok 30 a minutos ti napalabas sakbay a naideklara a fire out.
Kabayatanna, agpapan a maisursurat ti damag ket saan pay a masinunuo ti bilang dagiti bakuna a nadadael gapu iti nasao nga uram.
Immunan nga inpakaammo ni Aguinaldo nga awan met ti nadangran nga indibidual iti nasao nga insidente.
