LAOAG CITY – Mabalin a bumaba ti Maximum Suggested Retail Price (MSRP) para iti bagas gapu iti agtultuloy a panagbaba ti global rice prices ken panagdu-as ti piso.
Segun ken ni Department of Agriculture (DA) Secretary Francisco Tiu Laurel Jr., daytoy ket kalpasan a pimmigsa ti piso kontra iti dolyar iti P57 level, napigpigsa no idasig iti P59-level.
Iti baet daytoy, ti agdama a Maximum Suggested Retail Price para iti 5% broken imported rice ket naikeddeng iti P49 iti kada kilo idi Marso 1, maikapat a panagkissay sipod idi immuna a naipatungpal ti Maximum Suggested Retail Price iti balor a P58 iti kada kilo idi Enero 20.
Naammoan a sakbay pay a naan-anay a naipatungpal ti Maximum Suggested Retail Price, ti retail price para iti 5% broken imported rice ket P62 iti kada kilo agingga iti P64 iti kada kilo.
Inbatad pay ni Tiu Laurel a ti Maximum Suggested Retail Price ket epektibo iti panag-impluwensia iti market prices.
