LAOAG CITY – Natay ti driver ti motorsiklo kalpasan a naidungpar iti manarimaan a maikalkalawa a paset ti national highway ti Brgy. Sapat junction bisinidad ti Barangay Nagsanga iti ili a Pasuquin.
Nabigbig ti driver ti motorsiklo a ni Belmark Etol y Tanghal, addaan ti umno nga edad, tubo iti Zamboanga City ngem agdama nga agnanaed iti Brgy. Barit ditoy ciudad ti Laoag idinto a ti lubbon na ket ni Jaylord Cabunos y Valentin, agtawen ti 17 ken residente iti Brgy. Iringan, Allacapan, Cagayan.
Basar iti inisyal nga imbestigasyon, napaspas ti motorsiklo bayat nga agpaamyanan a direksiyon iti nasao a lugar.
Apaman a madanon da ti kurbaan a paset ti kalsada ket iplasplastar ti driver ti side mirror ti nasao a lugan ket dita a naawanan iti kontrol ti manibela rason a nadisgrasya da.
Gapu iti daytoy, dagus a naitaray dagiti biktima iti GRASMH ngem naideklara a dead on arrival ni Etol idinto a nagsagaba iti gasgas iti nagduduma a paset ti bagi ni Cabunos.
