LAOAG CITY – Nangidanun iti tulong ken relief goods dagiti rider group iti kaaldawan dagiti puso iti pamilya Gappi kalpasan a nauram ti pagtaengan da iti Brgy. Parangopong iti siudad ti Batac idi Pebrero 15 ita a tawen.
Napanunutan ti maysa kadagiti lider ti grupo a ni Mr. Jason Santiago nga iti aldaw dagiti puso a mayuswat ti pannakaipaay ti tulong iti nasao a pamilya.
Awan ti naisalbar ti pamilya nga anyaman a gamit kalpasan a nauram ti pagtaengan da.
Dimmalan dagiti rider iti nasulimek a paset ti barangay tapno maidanun dagiti tulong kas iti electric fan, dagiti arwaten, de lata ken dadduma pay.
Naamuan nga addan dagiti grupo dagiti rider a nakaipaayen ti tulong sakbay ti kalaadawan dagiti puso.
Plano pay dagiti dadduma a grupo a tulungan ti pamilya tapno maurnos ti pagtaengan da.
Maipalagip a nauram ti pagtaengan ti pamilya Gappi iti nagturong da iti barangay hall para iti panagtimbang dagiti ubbing.
Nauram ti pagtaengan gapu ti napanawan a naglutoan iti kanen ti baboy iti dalikan.
