LAOAG CITY – Suportado ni House Speaker Bojie Dy III ti inaprubaran a substitute bill ti House Committee on Public Information para iti proposed Right to Information (RTI) Act ti 2026.
Segun ken ni Dy, gagem ti nasao a linteg nga ipaayan ti bileg ti umili ken papigsaen ti laban iti pagilian kontra iti korapsyon.
Inbatad ni Dy a no ti umili ket addaan ti access iti impormasyon, mausar daytoy kas nabileg nga instrumento iti laban kontra iti korapsyon gapu ta ‘knowledge is power.’
Inlawlawag pay ni Speaker Dy a ti transparency ket kangrunaan a proteksyon kontra iti panagabuso iti turay.
Innayon na a no adda ti access ti publiko iti impormasyon, naur-urnus da a matingiting ti garaw ti gobierno ken mapagsungbat dagiti institusyon.
Immunan nga inaprubahan ti House Committee on Public Information, nga indaulwan ni Rep. Lordan Suan, ti substitute bill ken committee report, a gagem ti gakat nga ipatungpal ti konstitusyonal a karbengan ti umili iti impormasyon ken siguradwen ti sibubukel a public disclosure kadagiti transaksyon ti gobierno nga addaan ti public interest.
