LAOAG CITY – Dinepensaan ni Senate President Chiz Escudero ti pannakalungalong ti Rightsizing bill iti Senado.
Iti sponsorship speech ti senador iti plenario, inlawlawagna a saan a nairanta ti singasing a mangkissay kadagiti empleado ti gobierno.
Impaganetgetna a ti panggep ti Senate Bill 890 ket tapno maipangato ti kalidad ti serbisio ti gobierno ken mangparnuay kadagiti posision a maitutop ken pudno a kasapulan dagiti umili.
Kunana a masapul laeng nga ikkaten ti redundancies wenno repetition ti posision ken pagrebbengan, pasimpleenna ti proseso ken ipamaysana dagiti prioridad a makatulong iti gobierno ken makailatang kadagiti rekurso kadagiti programa a talaga a kasapulan dagiti Pilipino.
Inlawlawag pay ti senador a saan a saklawen ti Rightsizing bill ti armado a puersa ken dagiti military ken uniformed personnel kasta met ti sektor ti edukasyon, Kongreso, Korte Suprema, constitutional commission, ken ti lokal a gobierno.
