LAOAG CITY – Rinibo a demonstrador ti nakaengkwentro dagiti pulis idiay Serbia.
Ipetpetteng dagiti demonstrador ti pannakaiyuswat ti nasapa nga eleksyon tapno masukatanen ni President Aleksandar Vucic a 12 a tawen nan nga agserserbi iti nadakamat a pagilian.
Umabot iti agarop 14 a ribo a demonstrador ti nagtitipon iti ciudad ti Belgrade a kabisera ti Serbia tapno ipanawagan ti pannakaiwayat ti nasapsapa nga eleksyon.
Naamoan a dinosdosena metten a demonstrador ti inarestar dagiti otoridad no sadinno a nagusar pay dagiti pulis ti tear gas ken stun grenades.
Mainaig iti daytoy, inakusaran ni President Vucic a ti panawagan dagiti demonstrador a pannakaiwayat ti nasapa nga eleksyon ket paset ti foreign plot a gagem na a mangagaw ti pagilian nga iturayan na.
Inpetteng ti presidente a saan to pulos nga agballigi dagiti demonstrador iti panggep da.
