LAOAG CITY – Nakadanunen dagiti rinibo a demonstrador iti ciudad ti Islamabad a kabisera ti Pakistan tapno ipanawagan ti pannakawawya-waya ni dati a Prime minister Imran Khan.
Sakbay a nakadanun dagiti naruay a demonstrador iti ciudad a nabarikadaan tapno saan a basta makastrek dagiti maseknan ket ado a tear gas ti inbakal kadakuada dagiti kameng ti armed forces tapno malapdan dagitoy a makadanun iti Democracy Square a pakasarakan kadagiti government buildings.
Maipalagip a ni Khan ket manarimaan ti panangiserbi na ti tallo a tawen a pannakabalud gapu iti kaso a panagkunniber a naiget a naglikudan na.
Ti panagturong dagiti supporters ni Khan iti ciudad ket gapu metlaeng iti naudi a panawagan na nga agtalinaed dagitoy iti lugar agingga a saan a patgan ti gobierno ti kiddaw da a pannakawaya-waya na.
Gapu iti daytoy ket sinerraan dagiti otoridad dagiti highways ken sinuspenso da ti mobile ken internet services kadagiti apektado a lugar.
Ginasut metten a demonstrador ti naarestar dagiti otoridad sipud rinugyan da ti nagmartsa idi domingo.
