LAOAG CITY – Rinibo a nagbakwit a Palestinians ti nagsublin iti northern Gaza kalpasan a naitantan gapu iti saan a pagkinnaawatan ti Hamas ken Israel.
Maipalagip nga agturong koma dagiti Palestinians iti amyanan ti Netzarim Corridor idi sabado, Enero 25 ita a tawen no sadinno a nagtitipon ti ado a tattao bayat iti panagur-uray da iti ipapanaw da iti lugar a kontrolado ti Israel.
Nupay kasta, linapdan ti Israel dagiti Palestinians manipod iti ibaballasiw da iti corridor gapu ta napaay ti Hamas a nangwaya-waya iti civilian hostage da a ni Arbel Yehud.
Kalpasan iti naiget a dayalogo manen ti Israel ken Hamas ket immanugot da iti katulagan para iti pannakawaya-waya ni Yehud ken dua pay nga hostages intono hwebes, Enero 30 ita a tawen.
Kagiddan iti daytoy, nangipatulod pay ti Hamas iti Egyptian mediators ti pammaneknek a sibibiag pay ni Yehud.
