LAOAG CITY – Naka-engkwentro dagiti pulis ti Georgia dagiti anti-government protesters a manggandat a rumaot iti presidential palace iti ciudad ti Tbilisi a kabisera ti pagilian.
Napilitan dagiti Security forces a nagusar ti water cannons ken pepper spray tapno mawara dagiti demonstrador.
Ti nasao a pagilian ket sumangsango ti krisis sipud nagballigi ti Georgian Dream party iti parliamentary election a naisayangkat iti napalabas a tawen no sadinno nga ibilang ti pro-European Union opposition a naswitik ti resulta ti botos.
Maipalagip a sipud idi ket insardeng ti gobierno ti makisarita ken makipaset iti European Union.
Immuna iti daytoy, nagmartsa dagiti rinibo a demonstrador iti central Tbilisi kagiddan ti panangiway-wagayway da ti bandera ti Georgia ken European Union.
