LAOAG CITY – Rinibo a tattao ti nagtitipon iti Austria tapno mangiwayat ti candlelight vigil para kadagiti biktima iti napasamak a pammaltog iti secondary school iti ciudad ti Graz a nakatayan ti 11 a tattao ken nakasugatan ti naruay a sabsabali pay.
Maipalagip a kalpasan ti insidente ket nagpakamatay metlaeng ti suspek a dati nga estudyante iti nadakamat a pagadalan babaen ti panangpaltog na ti bukodna a bagi iti bathroom.
Maibilang ti nasao a pasamak kas “deadliest incident” iti pakasaritaan ti Austria.
Iti statement, inbatad dagiti otoridad a nakakita da ti “farewell letter” ken ti non-functional pipe bomb kabayatan ti panagsukimat da iti balay ti suspek.
Agpapan ita ket saan pay a maibaga dagiti otoridad no ania ti pudno a motibo ti suspek iti insidente.
Immunan a naideklarar ti tallo nga aldaw a panagladladingit iti intero nga Austria.
Kagiddan iti daytoy, naikabil iti half mast ti bandera ti Austria iti Hofburg Palace iti Vienna nga isu iti ayan ti opisina ni President Alexander Van der Bellen.
Nagtalinaed met a nakaserra ti pagadalan ken saan pay a masinunuo no kaano nga aglukat kalpasan iti insidente.
Mainaig iti daytoy, inrakurak ni Austrian Chancellor Christian Stocker a ti napasamak a trahedya ti maibilang a kalideman nga aldaw iti pakasaritaan iti pagilian ken indeklarar na ti pammaltog kas “national tragedy”.
