LAOAG CITY – Nangrugin a nagsangpet ti Middle East ti rinibo a soldado manipod iti elite 82nd Airborne Division ti U.S. Army, kabayatan ti panangpanpanunot ni U.S. President Donald Trump ti sumaruno nga addang iti gubat kontra iti Iran.
Naamoan a dagiti soldado manipod iti Fort Bragg iti North Carolina, ket nayun dagiti imuna a naipatulod a pwersa ti Estados Unidos karaman dagiti Marines, Navy, ken Special Operations units.
Idi weekend, sumuruk-kumurang a 2,500 Marines ti summangpet iti rehiyon.
Saan pay a nalawag no sadinno ti eksakto a pakaipatuludan dagiti tropa, ngem namnamaen a paset daytoy ti panagsagsagana para iti possible a nalawlawa nga operasyon.
Iti agdama, awan pay ti pinal a desisyon no sumrek dagiti soldado nga Amerikano iti uneg ti Iran.
Basar kadagiti report, mabalin nga usaren dagiti tropa iti nagduduma a misyon, karaman ditoyen ti panangsakop iti Kharg Island a sentro ti agarop 90% ti oil exports ti Iran kagiddan ti panangipasigurado a natalged ti pannagna dagiti oil tanker iti Strait of Hormuz.
Adda pay dagiti maipagarop a saritaan maipanggep iti panagusar ti ground forces tapno maala ti highly enriched uranium ti Iran, nupay maibilang daytoy a narisgo ken komplikado nga operasyon.
Nupay kasta, ti possible a panagusar ti ground troops ket adda ti kasukat na a risgo iti pulitika, aglalo ket nababa ti suporta ti publiko iti Amerika para iti gubat ken siguden a nagkari ni Trump a liklikan dagiti baro a problema iti Middle East.
Kabayatanna, inbatad ni Trump a makisarsarita ti Amerika iti ad-adda a “reasonable” a liderato ti Iran tapno ileppasen ti gubat, ngem nagballaag a mabalin a rumaot ti Estados Unidos iti oil facilities ti Iran no saan a malukatan ti Strait of Hormuz.
Maipalagip a sipud nangrugi ti operasyon idi Pebrero 28, nasuruken nga 11,000 target ti inatake ti Estados Unidos no sadinno a nasurok a 300 a soldado ti nasugatan ken 13 ti natay iti babaen ti Operation Epic Fury.
