LAOAG CITY – Mamati dagiti supporters ti pamilya Marcos idiay France nga agballigi ni dati a senador Bongbong Marcos iti inpila na nga election protest.
Daytoy iti inbatad ni Mr. Jhay-ar Balico, presidente ti Bagong Bayani ng Mamayan France, taga Sarrat, Ilocos Norte ngem agdama nga agnanaed idiay France.
Segun ken ni Balico, mamati a magun-od iti hustisya kangrunaan na dagiti pada na nga ilukano.
Inlawlawag na a kalpasan iti eleksyon ket nangiyuswat da iti signature campaign idiay France gapu ta saan da a nakuntento iti nagbalin a resulta na.
Inpasigurado ni Balico a nakasubaybay da iti election protest ni Marcos agingga a saan a malpas ti nasao a kaso.
Kabayatanna, nadismaya ni Balico gapu ti maipagarop a saan a pannaki-kooperar Vice President Leni Robredo iti inpila nga election protest ni Marcos.
Inpetteng na a masapol a makitinnulong koma ni Robredo babaen ti panagbayad na ti 15 a milyon a pisos.
