LAOAG CITY – Naiwaras ti rinibribu a pulis kadagiti kangruanaan a kalsada ti Sydney idiay Australia iti panangsarabo ti baro a tawen kalpasan ti mass shooting iti Bondi Beach.
Napalubosan dagiti sumagmamano nga opisial a mangitugot kadagiti nangangato a klase ti armas kas paset iti pannakaipaiget kadagiti addang para iti seguridad.
Basar iti New South Wales (NSW) Police, adda ti sumurok 2,500 nga opisial ti naka-duty iti intero a siudad.
Nagkaykaysa dagiti naruay a tattao para iti maysa a minuto a panagulimek tapno lagipen dagiti nagbalin a biktima iti pammaltog idinto a napasilawan ti puraw a silaw iti Sydney Harbour Bridge kas simbolo ti kinakappia.
Maipalagip a pinaltu-paltogan dagiti agama a suspek nga isuda Sajid Akram nga agtawen ti 50 ken ti anakna a ni Naveed nga agtawen ti 24 dagiti tattao nga adda iti Jewish festival a nangitunda ti pannakatay ti 15 nga indibidual.
