LAOAG CITY – Sumango iti unpaid leave ti rinibu a federal workers kalpasan ti United States government shutdown.
Daytoy ket kalpasan a napaay ti Senado a maipasa iti maudi a minuto a funding bill wenno nailungalong a pundo a mangitultuloy koma iti operasion ti gobierno.
Gapu iti daytoy, temporario a maipasardeng ti sumagmamano ngem saan amin dagiti serbisio ti gobierno.
Naammoan a daytoy ti kaunaan a shutdown sipod pay idi tawen 2018 agingga iti 2019.
Basar iti report, maapektaran ditoy dagiti sumagmamano nga ahensia ken dagiti mangmangged ti gobierno idinto a dagiti napapateg a serbisio kas ti seguridad ken salun-at ket agtultuloy.
Daytoy a pasamak ket resulta ti saan a nagkaykaysa dagiti Senador iti pundo ti gobierno a nangitunda ti kellaat a pananakaiserra ti sumagmamano nga operasion ti gobierno ti Amerika.
Mainaig iti daytoy, nagpangta ni United States President Donald Trump ti mass ”irreversible” firings para kadagiti federal workers no agpaut ti shutdown.
Kabayatanna, dagiti maibilang nga essential workers ket agtultuloy nga agtrabaho idinto a dagiti dadduma ket saan a mabayadan ngem dagiti dadduma a government employees ket addan iti unpaid leave, dagiti met pulitiko iti Kongreso ket agtalinaed a mabayadan.
Iti agdama, agpinpinnabasol iti tunggal maysa ti Republicans ken Democrats gapu iti pannakapaay ti pannakaipasa ti gakat no sadinno a kasapulan ti 60 manipud iti 100 a Senador tapno maaprobaran daytoy.
