LAOAG CITY – Timmalaw ti rinibu a Palestinians gapu iti agtultuloy a panangraut ti Israel idiay Gaza City.
Basar iti Hamas-run health ministry idiay Gaza, kagudua ti bilang dagiti pasiente ken pamilia dagitoy ti timmalaw kalpasan ti tallo a nagsisina a panangatake iti al-Ranitisi a maysa a children’s hospital.
Segun iti Israeli military, nangiwayatda ti 150 a “terror targets” idiay Gaza City iti uneg ti dua nga aldaw.
Gagem ti grupoda nga abaken ti agarup tallo a ribu nga Hamas tapno naan-anayen a mawaya-wayaan dagiti hostages nga iggemda.
Nagpanawagan ti sumurok 20 nga aid agencies kadagiti world leaders nga agtignay gapu iti kumarkaro a situasion idiay Gaza ken aglippas ti riribuk iti kabiitan a panawen.
Nagibakwit dagiti naruay a Palestinians a nagturong iti abagatan manipud idiay Gaza City babaen ti donkey carts, rickshaws, lugan idinto a dagiti dadduma ket nagnagna kabayatan iti panangitugotda kadagiti kagamitanda.
Nupay kasta, nagsubli dagiti sumagmamano a Palestinians iti amianan kalpasan nga awan ti espasyo iti pangestablisaranda kadagiti tents-da.
Mainaig iti daytoy, inpakaammo ti Israel Defense Forces, adda ti agarup 350 a ribu nga indibidual ti nagtalawen idiay Gaza City idinto a basar iti United Nations ket adda ti 190 a ribu sipod idi Agosto ken mapattapatta a saan a bumaba iti 650 a ribu ti nagtalinaed iti lugar.
Kabayatanna, naammoan nga adda ti 64,964 a tattao ti napapatay babaen ti Israel sipod nangrugi ti rinnupak no sadinno kaaduan kadagitoy ket dagiti babbai ken ubbing kas maibasar iti Gaza health ministry.
