LAOAG CITY – Timmalaw dagiti rinibu nga indibidual iti Thai-Cambodia border kalpasan ti rinnupak.
Naibakwit dagiti naruay a residente iti Thailand ken Cambodia border gapu iti kumarkaro a rinnupak a nakatayan ti lima nga indibidual.
Agpada nga inakusaran dagiti dua a pagilian ti tunggal maysa iti panangrugi ti kinaranggas nga isu ti kadagsenan a komprontasion iti nagbaetan ti dua a pagilian sipod idi immannugotda iti ceasefire idi Hulio.
Mainaig iti daytoy, inrakurak ni Prime Minister Anutin Charnvirakul ti Thailand a saan pulos a kinalikaguman ti pagilianda ti kinaranggas ngem masapul nga agaramid ti tignay para iti panagtalinaed ti soberania idinto nga inakusaran ni dati a leader ti Cambodia a ni Hun Sen dagiti Thai “invaders” iti panangibales.
Kabayatanna, naammoan a sipod idi Mayo kagiddan ti bumarbara a tension ti dua a pagilian ket nangitunda ti pannakatay ti sumurok 40 a tattao ken pannakaipatungpal ti import bans ken travel restrictions.
