LAOAG CITY – Kinumpirmaran ni Barangay Chairman Pepito Cabacungan iti Brgy. Oaig-Upay iti ili ti Paoay nga adda ti riri iti nagbaetan dagiti biktima ti pammaltog ken ti suspek seknan iti right of way iti sanikua da iti Brgy. Laoa iti nasao nga ili.
Daytoy ket mainaig iti possible a motibo ti pannakapalto-paltog ni Ester Baclig a poon ti nakatayan na ken ti anak na a ni Roque Baclig a nasugatan met iti nasao nga insidente idinto ti suspek ket ni Cadelario Lagundino.
Segun kenni Cabacungan, ti ammo na ket naurnusen ti susik iti nagbaetan dagiti maseknan mainaig ti right of way gapu ta naikkan ti farm to market road ken nasemento daytoyen.
Kuna na nga awanen iti sabali a nagririan dagiti agkabagyan no diket pakaseknan laeng ti right of way no sadino nga adda pay ti pannakaserra daytoy iti kallabes.
Nagkabagyan da Baclig kenni Lagundino gapu ta kabsat ti biktima ti asawa ti suspek.
Innayon ni Cabacungan nga agnanaed ti biktima iti Brgy. Laoa ken agar-aramid da ti hallowblocks idinto a nakarehistro da iti Brgy. Oaig-Upay.
