LAOAG CITY – Nagbalin a kangrunaan a topiko iti United Nations General Assembly idiay New York ti agtultuloy a mapaspasamak a riribok iti Gaza.
Inbatad ni Pakistani Prime Minister Shehbaz Sharif a nasken nga adda ti aramiden ti lubong tapno mangsolbar iti nabayagen a parikot ti nasao a pagilian.
Kunana a masapol nga agkaykaysa ti United Nations member countries ken lappedan ti riribok.
Binabalaw ni Turkish President Recep Tayyip Erdogan ti sistema ita ti United Nations gapu ta saan a dagus daytoy a nagtignay tapno malappedan ti panagadu dagiti ubbing a matmatmat iti Gaza.
Ginutigotna dagiti amin a lider iti nagduduma a pagilian a lappedan ni Israeli Prime Minister Benjamin Netanyahu iti panangilungalong daytoy kadagiti rinnupak.
Iti biang ni United States President Joe Biden a nasken a maaddaan ti ceasefire iti nagbaetan ti Israel ken Hamas.
Innayonna a daytoyen ti umiso a panawen tapno isapinal ti termino ti katulagan ken agsardengen ti kumarkaro iti Gaza.
