LAOAG CITY – Bimmaba ti bilang dagiti nairekord a road crash incidents ditoy probinsya para iti umuna a kwarter ita a tawen no ikompara iti datos iti isu metlaeng a panawen idi 2023.
Daytoy ti inbatad ni Police Major Jephre Taccad, ti Chief Provincial Operation Management Unit iti Ilocos Norte Police Provincial Office.
Segun ken ni Taccad, umabot iti 80 nga insidente ti nairekord iti napalabas a tawen idinto nga ita a tawen ket 75.
Kuna ni Taccad a manipod iti 75 a road crash incidents a napasamak sipud Enero 1 agingga iti Mayo 12 ita a tawen ket 21 ti pimmusay.
Gapu iti daytoy, inrakurak ni Taccad nga adda ti pammilin ni Provincial Director Police Col. Frederick Ubar kadagiti amin a police statios nga agiwaras ti patrollers iti national highway.
Inlawlawag na a basar iti datos da ket 59 kadagiti insidente ditoy probinsya ket napasamak iti national highway idinto a 10 laeng iti provincial road ken innem iti barangay road.
