LAOAG CITY – Maysa nga Engineering Center idiay Japan ti nakagun-od ti world record kalpasan a nakaaramid ti robot a kabaelanna nga ag-solve ti Rubik’s cube iti uneg ti 0.305 seconds.
Kinumpirmaran ti records keeping organization a Guinness World Records a ti Component Production Engineering Center ti Mitsubishi Electric Corporation ti baro a record holder ti titulo a “Fastest robot to solve a rotating puzzle cube.”
Ti Rubik’s Cube ket maysa a 3D combination puzzle nga aramid ni Ern. Rubik, maysa nga Hungarian Architect ken Professor of Architecture.
Binukel ni Rubik ti umuna a modelo ti cube idi 1974 ken nairuar daytoy iti publiko idi 1977. Daytoy ket bukbuklen dagiti babassit a cubes a mabalin a garawen kadagiti nagduduma a direksion ken ti gagem daytoy ket maisubli iti orihinal nga urnosna no sadino ti side ti cube ket addaan ti kapada a maris.
Ti Rubik’s Cube ket nagbalin a simbolo ti logic ken problem-solving iti intero a lubong ken maysa kadagiti mailaklako ken sikat a puzzle iti pakasaritaan.
Iti agdama, ti kaalistoan a tao a kabaelanna nga ag-solve ti rubik’s cube ket addaan ti rekord a 3 seconds.
