LAOAG CITY – Maysa nga automotive company idiay Japan ti nakaawat ti Guinness World Record title a “Farthest Basketball Shot by a Humanoid Robot” kalpasan a nakaaramid isuda ti robot a nalaing nga ag-shoot ti bola.
Ti humanoid robot a ni CUE6 a pinartuat ti maysa a Motor Corporation ket naminsan manen a nagpabuya iti benneg ti teknolohia kalpasan a nakagun-od ti Guinness World Record para iti kadaywan a basketball shot ti maysa nga humanoid.
Iti kaadayona a 80 a kadapan, naaramid ni CUE6 ti naisangsangayan a panag-shoot idi Setiembre 26 idiay Nagakute, Aichi, Japan.
Nupay kasta, saan a dagus a simrek ti umuna nga attempt daytoy iti panag-shoot ti bola, balligi a naisayangkat daytoy iti maikadua a pananggandatna babaen iti advanced nga artificial intelligence a nag-adjust ti anggulo.
Manipud iti simple nga eksperimento idi 2017, dimmur-as ni CUE6 manipud kadagiti piyesa a naaramid iti LEGO nga agturong iti panagbalin nga advanced machine nga arig agkalaingda iti professional basketball player.
