LAOAG CITY – Saan a naglukat ti klase ti Rodolfo CG Fariñas Jr. National Science High School iti Brgy. Vira ditoy siudad ti Laoag iti baet nga ita nga aldaw ti panagrugi ti klase kadagiti amin a pampubliko a pagadalan iti intero a pagilian.
Daytoy ti kinumpirmaran ni Ms. Flenie Galicinao, Officer In Charge iti nasao a pagadalan.
Segun kenkuana, saan a natuloy ti panaglukat ti klaseda ita nga aldaw kalpasan nga awan pay ti kuriente iti nadakamat a pagadalan rason a saanda a makaiyuswat ti panagklase kadagiti estudiante.
Gapu iti daytoy, inlawlawag ni Galicinao a nagsurat isuna iti Department of Education – Schools Division Office ditoy Ilocos Norte ti agdama a situasionda a nangitunda ti pannakaiyalud-od ti panagserrek dagiti maseknan nga agad-adal.
Malaksid iti daytoy, naammoan ti Bombo Radyo Laoag News Team babaen ken ni Mr. Ahlden Salgado, maysa kadagiti mangisursuro a maysa kadagiti kangrunaan a rason ti pannakaitantan ti panaglukat ti klase iti nasao a pagadalan ket ti kinaawan ti danum ken ti maipagarup a natakaw ti waya ti generator.
Mainaig iti daytoy, manamnama nga inton Agosto 5 ti pormal a panagsubli iti klase dagiti 56 nga enrollees ti Rodolfo CG Fariñas Jr. National Science High School a kakaisuna a pagadalan ditoy probinsia a saan a nakagiddan iti panaglukat ti klase ita nga aldaw.
Kabayatanna, naimatangan ti News Team ti agtultuloy a panagdaldalus dagiti maseknan a mangisursuro tapno ad-adda a nakasaganadanto iti panagsubli dagiti maseknan nga agad-adal.
