LAOAG CITY – Naibusan ti lokal a gobierno iti siudad ti Laoag ti RT-PCR test kits bayat ti pannakaiyuswat ti mass swab testing iti dayaen a paset ti Laoag City Public Market and Commercial Complex.
Segun kenni Dr. Joseph Adaya, mangidadaulo ti contact tracing team ditoy siudad, adu dagiti agkalikagum a dumalan iti swab testing isut gapu na a nagkurang ti 500 a test kits a naisagana.
Kabayatanna, maragsakan ni Mayor Michael Marcos Keon ditoy siudad agsipod ta adu dagiti mangayat a dumalan iti swab testing iti laksid nga adu ti kritiko iti nagbalin a sitwasyon iti merkado publiko kabayatan ti pannakaiyuswat ti testing.
Inbatad na a gapu iti nangato a bilang dagiti agkalikagum a dumalan iti testing ket posible nga alalisto ti pannakaikkat ti MECQ ditoy siudad.
Rumrumuar nga umabot iti 405 nga empleado ti merkado publiko ti dimmalan ti swab testing ken 123 iti Laoag City Hall.
Naamoan a daytoy ti kadakkelan a bilang dagiti dimmalan iti swab test iti uneg ti maysa nga aldaw manipod nangrugi ti panagngato ti kaso ti covid-19 ditoy siudad.
Mainaig iti daytoy, target ti siudad a dumalan iti swab testing dagiti 2,000 nga indibidual ken manamnama a malpas iti uneg ti tallo agingga uppat a lawas.
