LAOAG CITY – Nagtalinaed a naulimek ita ti aktres a ni Ruffa Gutierrez iti inruar a desision a guilty kontra iti nobio daytoy nga aktor ken dati a Quezon City Mayor Herbert Bautista.
Inyetnag a guilty ti Sandiganbayan ni Bautista ken dati a City Administrator daytoy a ni Aldrin Cuña gapu iti graft.
Namunganay ti kaso iti panangiparuk-at ni Bautista ti P32.107 milyon kas pakabuklan a bayad iti maysa nga Information Technology firm para iti panaggatang kadagiti online occupation permitting ken tracking system idi 2019.
Rumrummuar a simrek ni Bautista iti maysa a kontrata ken inaprobaran ti pannakaiparuk-at ti pakabuklan a bayad uray saan pay a nai-deliver ti proyekto ken ti kinaawan ti ordinansa nga inaprobaran ti Sangguniang Panglungsod.
Iti nairuar a 148 a panid a desision ti Special Seventh Divison, napaneknekan a guilty beyond reasonable doubt da Bautista ken Cuña gapu iti panaglabsing iti Section 3 ti Anti-Graft and Corrupt Practices Act.
Idi Hunio 2024 idi admitaren ti aktres nga adda ti relasionda iti komediante ken dati a pulitiko a ni Herbert Bautista.
Inbatad met ti abugado ni Bautista a ni Atty. Nilo Divina nga iyapelada ti nasao a kaso iti Sandiganbayan.
