LAOAG CITY – Naan-anayen a napabaro ken na-upgrade ti Rural Health Unit 3 ditoy ciudad ti Laoag.
Kagiddan iti daytoy, inpasigurado ni Dr. Rodrigo Catcatan, ti mangidadaulo ti City Health Office, ti pannapadur-as ti nasalun-at dagiti umili, kasta pay ti pannakapay ti alisto ken naan-anay a serbisio medikal.
Kuna na a mai-upgrade dagiti pasilidad dagiti health care provider ti siudad kas ti Laoag City General Hospital ken dagiti Rural Health Units (RHU) kas ti pannaka-renovate ken pannakapabaro ti Rural Health Unit III iti Barangay Cabungaan-A ditoy ciudad ti Laoag.
Inpakaammo ni Dr. Catcatan a maysa daytoyen a Primary Care Facility ken Birthing Home babaen ti tulong ken panangidonar ti SM Foundation, Inc. nga inisiatibo ti City Government.
Kabayatanna, mangnamnana ni Mayor James Bryan Alcid a dakkel a pakalag-anan ti tunggal maysa, kangrunaan dagiti residente iti South of the River ti Rural Health Unit III.
Ibilang ti mayor a napateg ti salun-at isut gapuna nga ar-aramiden amin ti lokal a gobierno ditoy ciudad dagiti wagas tapno maipatungpal ti de-kalidad a serbisio medikal kadagiti residente ditoy ciudad.
