LAOAG CITY –Inaramid amin ti Rural Health Unit iti ili ti San Nicolas ti kabaelan da tapno marespondean dagiti biktima a karaman iti insidente idi rabii ti Mayo 18, 2024 no sadinno a nakairamanan ti maysa a motorsiklo ken ambulansya.
Daytoy ti inpakaammo ni Mayor Mike Hernando iti nadakamat nga ili kalpasan nga adda dagiti sayangguseng a nabayag a nagresponde ti ambulansya ti nasao nga ili.
Iti palawag ti Mayor, apaman a naitawag ti insidente ket awan pay ti lima a minutos ket nakadanonen ti ambulansya iti Brgy. 11, San Fernando iti ili ti San Nicolas nga isu ti nakapasamakn ti insidente.
Gapu ta critical ti maysa ket isu ti immuna a naipan iti Mariano Marcos Memorial Hospital and Medical Center iti ciudad ti Batac, bayat a ti maysa ket naitaray iti Black Nazarene Hospital iti ili ti San Nicolas.
Inpakaammo pay ti Mayor nga iti kada aldaw ket adda laeng ti tallo a driver ti agsisinnublat para iti tallo a shift.
Mainaig iti daytoy, nagballaag ni Mayor Hernando iti publiko nangruna kadagiti agbibiyahe no mangegan da ti arimbangaw ti ambulansya ket dagos nga agpaigid, ken saan a liplipatan nga isuot dagiti safety gears tapno maliklikan ti desgrasya.
