LAOAG CITY – Naipan iti babaen ti “Code White alert” dagii amin a Rural Health Units iti Ilocos Norte iti daytoy a panawen ti paskua agingga iti panangpasangbay iti baro a tawen.
Inlawlawag ni Provincial Health Officer Dr. Rickson Balalio a paset daytoy iti kalikagum ti Provincial Government of Ilocos Norte nga idadauloan ni Gov. Cecilia Araneta Marcos a maipasigurado a nakasagana dagiti amin nga agserserbi kadagiti nadakamat a pasilidad nga agresponde iti panagkasapulan dagiti kakailian nga adda pakainaigan iti salun-at.
Inbatadna a nabalakadan dagiti amin nga RHU ditoy probinsia a mangipakaammo iti PHO kadagiti amin a respondian dagitoy nga insidente nangnangruna iti adda pakainaigan dagiti masugatan gapu iti paputok.
Inbunannagna nga adda ti umiso a proseso pakaseknan iti pannakaireport dagiti ania man a marespondian nga insidente iti daytoy a “holiday season”.
Mangnamnama ni Balalio a bumaba wenno awanen ti maireport a kaso nga adda pakainaigan ti paputok.
Mainaig iti daytoy, nagpanawagan ti Provincial Health Officer kadagiti kakailian ti panangisigurado dagitoy iti kinatalged ti salun-atda.
Kiniddawna a no adda pannakabalinna ket awan koman ti agusar ti paputok ditoy probinsia.
Malaksid iti daytoy, umapela iti panangkita a naimbag ti tunggal maysa kadagiti ipauneg a taraon iti daytoy a “holiday season” a kaadu dagiti maidasar a taraon.
Innayonna a masapul ti panagragragsak a saan a buyugan iti panaginom ti arak para iti pagsayaatan ti tunggal maysa.
