LAOAG CITY – Maeksamen ti rurug ti maipagarop a babai a nabirukan iti kabanbantayan a paset ti Barangay 23, Barabar, San Nicolas, Ilocos Norte.
Daytoy ket tapno maamoan no ania ti nakatayan ti saan pay a nabigbig a biktima.
Kabayatanna, kinumpirmaran iti Bombo Radyo Laoag ni Barangay Chairman David Pascual nga iti kallabes ket adda dagiti taga ili ti Solsona a napan nagbirbiruk ti kabagyan na iti nadakamat a barangay.
Nupay kasta, saanen a nangipaay ti dadduma a detalye ti kapitan mainaig ti pakabigbigan dagiti dakdakamaten na a taga Solsona.
Innayon na nga imbitaran danto dagiti maseknan tapno maamoan no ti nabirukan a rurug iti barangay da ket isu ti birbiruken da iti kallabes.
Agtultuloy pay laeng ti imbestigasyon dagiti otoridad mainaig iti daytoy a pasamak.
Rurug a maipagarop a maysa a babai, nabirukan iti kabanbantayan idiay ili ti San Nicolas
